Luk 19 | BEF | STEP | Yesu Yeliko hepalugu tiloto ana hepa'i folaganugu bilube'mu hu'ehina.

Luke 19

Sakiasi ka'a

1 Yesu Yeliko hepalugu tiloto ana hepa'i folaganugu bilube'mu hu'ehina. 2 Bo mone mino'ehina gi'a Sakiasi. Ai takisi lilata nehanalo kaba hu'ehina aitoga efaha'a babu lito mino'ehina. 3 Ai Yesu hena huse bo nohifi luto bu galube'mu hu'ehina. Ya hina ai hupamone bo nohigo asaga bona'magi Yesuhi le'mo folagaha'anigu mele'ahago ai Yesuhi bu mego'ehina. 4 Ya huloto ai kohe toga hololu luto buto sifehe yafagu tiloto'a afenuga oto Yesu nobinogo ai bu golago limito bu galube'mu hu'ehina. 5 Ya higo Yesu ana yafa hapa'alo oto ho tiloto bu golago tito Sakiasihi bu goloto ma luto lu'ehina: Sakiasio, kai hololu luto limibo. Nani yatai kai hiti buto nohakagu minalu'ibe'mu nohube, lu'ehina yabe. 6 Sakiasiu yafaloti hololu luto limito yahi emito gelonaguti be tigito noha'aga bi'aha'ina. 7 Ya neha'igo asaga bona'i bu gelete gulu gulu bite ma lite li'ahana: Akae. Bati mehina suhi luto hetofa bomouba buto foipa bomofihi nonugu minalube'mu nohibe, lite enitaluga logo bi'ehina yabe. 8 Sakiasiu ho tiloto ma luto Sipi Bo Yesuhi lu emi'ehina: Sipi Bo, kai kehelibo. Nani yatai asaga fe'noha'ni folaganuguti fuku luto luga kegi'a fe'noha'ani menilina bona'i epilube. To bo mone'mofihi faga faga lu etoloto'ni ana'ina'a gumina li'ehiluna ya'ma luga'a loegi loegi molo babu lito emiluna'mu yabe, luto lu'ehina. 9 Ya ligo Yesu ma luto Sakiasi kumu lu emi'ehina: Yatai kaika naga'i Hu'mau a'enele'mo'ehibe. Ya'ma bo hiti ai Abalahahi tata'afu nohibe. 10 Hena'mugope Kokulumaguti limi'ehina Bouba ai bona'i fenene hi'ahana sa sa huto enele'mo huto hilube luto o'ehina yabe, luto Yesu lu epi'ehina.

Lili'nalo bomagi efahi li'ahana bame ka

Mt 25:14-30

11 Yesu lina kaga kehelina bona'i bame ka mone luto lu epi'ehina. Hena'mugope ai Yelusale hepa'i lebato oloto nominago enali Hu'mamofihi Kapo'a yatai ma'asi huto hilina'mu yabe, lite nekeheligo yabe. 12 Ya'mu Yesu ma lu'ehina: Sipi bo mone foto hepatoga bulenogo gihiti bo le'mo lolo hilune'mu hilana ai aku'i i behe huto hepa'aga alina'mu yabe 13 Mebu'ohuto yata'a teni'a lili'nalo bo'a kehe i nupa huto goli efahi epila nohuto ma luto lu epolo'ehina: Lenali ya'mana efahi nolepunaloti bisinisi melete efahi luga'a mone hiti li huto hilafi nani alihi oto bu lenagalube. 14 Ya nohigo hepa'alo bona'magi enali ana bo sipi ipakafa he'ahana. Ya nehago ana bo abufa nohigo bona'i luga'a enoho lifigo kaga lite mege'i lifite bite enali ma lite li'ahana: Ya'ma bouba ai lali gihiti boti lolo mehilibe luto keheli'ohune li'ahana yabe.

15 Ya hu'ehina alihi ana bo le'mo gihiti lolo hi'ahana. Ya hago ai oto ma luto lu'ehina: Koyapa'i efahi epi'ohuna lili'nalo bo'nimo kehe ilo. Nani epila epila huloto bu'ohuna efatoti henaki luga'a hiti efahi lila lila hi'ahafi nani bu go kehelilube. 16 Ya ligo yata'a nehetina bouba ma luto lu'ehina: Sipi bo, kai mone goli efahi nimi'ahatamoloti bisinisi moloto'ni teni'a lolo huto hu'ehina li'ohube. 17 Ya ligo gihiti bouba lu emi'ehina: Kai hetofa lili'na li'ahane. Kai bati lili'nalo pana'ni yabe. Kai lagaso mesonalo kaba hu bati hatago yatai sipi kigi kiminogo teni'a kaba hilane. 18 Yalo ana megesalo bouba oto lu'ehina: Sipi bo, kai goli efahi moneko'isi nimi'ahatamoloti nani lili'na emugo luga'a yatai efapo faifu'a li'ohube. 19 Ya higo gihiti bouba lu emi'ehina: Kai nayahi mone kegi'a su hago hepa'i kaba hilane, luto kele'mo nomolobe. 20 To mone lili'nalo pana'a nehetiloto ma luto lu emi'ehina: Sipi bo, mone goli efapo nimi'ahatamo ma li'ohube. Nani gulugu fala kito li gu'i keto'ohuna ma bati huto asaga'i ni'ibe. 21 Kaimo bu kogonamoya hosopa bo nohane, luto ya'ma bouba lu emi'ehina. Fato bona'magi ana'ina melelata nehana kai lilata nohane. Bona'magi nose'na foya'anigu hekelelata nehana kai ya'ma nose'na lilata nohane. Ya'mu kai kumu'i nani koli nohube luto ya'ma lili'nalo bouba lu'ehina. 22 Yalo gihiti bouba ana lili'nalo pana'a ma luto lu emi'ehina: Kai bati mehata lili'nalo pana'i yabe. Kaika kagakamu ka foyagu kele'mo malaluna'mu yabe. Nani'ya bo nohuto'ni bona'magi ana'ina'ani nolito to nose'na foya'anigu hekele'ahana yana'ani lilata nohuna bomo nohube. Keheli'ahapi, ya? 23 Ya hu'ehina'mu kai hena hibe luto efaha'ni efaha nonuga memolo netane? Ya hu'ahatita nani oto ana efaha nonugati efahi mone'a hiti molo emi'ahago lutita'mu yabe. 24 To sipi bouba ma luto analo nehana bona'i lu epi'ehina: Lenali ai ya'ma bologati mone goli efahi emi'ohunanamo lite luga'a teni'a li'ehina bo emilo, luto lu'ehina. 25 To enali ana bona'magi sipi bo lu emi'ahana: Sipi bo, ai babu li'ehinamo aku'i hena hibe luto ya'ma goli efahi mone hiti li emilune? li'ahana. 26 Nani lu nolepube, luto sipi bouba lu epi'ehina: Asaga bona'i ana'ina luga'a li'ehilana nani aku'i nana'anilo molo emi epalaluna'mu yabe. Ya hu'ehina to bo moneuba ana'ina melise fa'mene nohuto nesi'nasi li'ehilina be silito li he'miluna'mu yabe. 27 Ya hu'ehina enali nani kumu'i gihiti bo meminalane li'ahana fateha'ni enele'mete ete nani nubulo enoho fililo, luto gihiti bouba lu epi'ehina yabe.

Yesu gihiti bomagi suhi luto Yeslusale hepalugu ti'ehina

Mt 21:1-11; Mk 11:1-11; Yn 12:12-19

28 Yesu ana bame ka lu epiloto kohe toga Yelusale hepa kapo mege'i moloto bu'ehina. 29 Ya huloto ai Betefasi hepa'i hiti Betani hepa'i hiti nina o leba toloto Oliba kosaloti loe koko pana'a etoho lifigo etali kohe tete bifa hi'aha'ina. 30 Ai ma luto lu etimi'ehina: Letali muya nina hepato bite tilete ana hepalugu toki yaga ikele'a mone naga i'ehinogo ana yaga megesalo bona'i meti'ahana bigelete naga'a gulu fete le'mete aliyo. 31 To bo moneuba letoloka hoto hena hibe lite toki yaga gulu neha'ibe? nolinogomo letali ma lite lu emiliyo: Sipi boti'auba kehe igo yabe liliyo. 32 Etali ana kapo melete bilete asaga kaga Yesu lu etimi'ehina suhi ni'igo bu ge'aha'ina yabe. 33 Ana toki yaga gulu fete neha'igo toki yaga afo'afu ma luto etoloka ho'ehina: Letali hena hibe lite yaga'ni gulu nefa'ibe? 34 Ya noligo etali: Sipi boti'auba le'mete aliyo luto kehe igo yabe, lite li'aha'ina. 35 Ya lilete ana toki yaga le'mete Yesu nohinalo bi'aha'ina. Ya hilete ana toki yaga gupisalo gukete'ani melelete Yesuhi ifo'alo le'mo malago mino'ehina yabe. 36 Yesu ya huto toki yaga gupisalo nobigo asaga boana'magi gukete'ani kapogu molo lehete lite tibi'ahana yabe. 37 Yelusale hepatoti kapo mone Oliba kosalo limi'ehinalo Yesu o leba notago Yesuhi babu pana'alobomagi li nupa hilete Hu'mamofihi fokehi hete sipi kehe ilete hite Yesu asaga'na fato fato'i bu ge'ahago li huto hina'mu enegelo Hu'mamofihi bi emite: Hetofa suhi hu letane, li'ahana yabe. 38 Hu'ma ai Sipi Bomofihi gi'alo o'ehina bo lusa gi etoto amuya emilina'mu nohigo lali gi'a li saga hilune. Hu'mamofihi komopa'aguti ma bona'magitaloga bati hulata nohibe. Ifo muya Sipi Boti Hu'mamofihi gi'a liyafa hilune, li'ahana yabe. 39 Ya lite nehago Felosi bona'i luga'amagi ana bona folagaha'aniguti Yesuhi kehe ite ma lite li'ahana: Tisa kai pananaka lu epitogo kaga nelana anasi he'mino. 40 Yesu Felosi bona'magi ka'anilo lu'ehina: Nani lu nolepube. Nani he'milo luto lu epiluna nani kumu efahi ka'ma ninamagi kaga lilete yege fite enegelo bilana'mu yabe.

Yesu Yelusale hepa kumu yibi hu'ehina

41 Yesu Yelusale hepa lebato nehetiloto ana hepa'i bu golago bula ola huto beloloto yibi huto ma luto lu'ehina: 42 Yelusale naga'ise. Kai yatai bati huto fulunaguti minosemofihi hapa'a akehelitita bati huto mina tino. Ya hu'ehina yatai ya'manana fenene huto ni'igo kai bu megane. 43 Kai kehelibo. Alihi kana mone huto hilina yupahi fatehakamagi ete kele'mo bego hilete luba hilana ke'muya kifilana'mu yabe. Ya hite asaga kegi'ati kele'mo bego hite kele'mo folaganugu malalana'mu yabe. 44 Ya hite enali kele'mo tigili tegele sete kele'mo sibina sabana hilete ana hite anagu boana'i nehilana hiti enele'mo sibina sabana hilana'mu yabe. Ya hite efaha noha'a asaga'i tele bi su hete tili tele hite he'milana'mu yabe. Hena'mube? Kai Hu'mamofihi kana'alo oto nubuto bilibe luto keheli meemise minata'mu yabe.

Yesu sipi mono nonugu bu'ehina

Mt 21:12-17; Mk 11:15-19; Yn 2:13-22

45 Yesu sipi mono nonugu tiloto maketi melete ana mono nonugu nehana bona enele'mo fitu fo he'mi'ehina. 46 Ya nohuto ma luto lu epi'ehina. Mono kauba ma luto lulata nohibe:Noha'niya nunumu nohi minalibe. Ya hu'ehina lenali guminalo bona'magi suguna hepa'ani li lolo nehabe.

47 Yesu kana'amu kana'amu mono nonugu boana'i kaga lu epilata hu'ehina. Ya nohigo enali mono noto kaba bo keya kaga keheli bati hulata bo to asaga boana'magi kaba bo'ani enali asaga'i Yesuhi mapahi fite nehite kapo mone li hokolo hilete halune'mu hi'ahana yabe. 48 Ya hana asaga boana'i Yesuhi kaga'a amuya melete keheli bati hilune'mu hago yana'mu enali ana bomagi Yesuhi halana kapo'a li hokolo mehi'ahana yabe.